11 қыркүйек күні сағат 9-00 де «Тарих» кафедрасының 6В02211-Тарих білім беру бағдарламасының 1 курс студенттеріне арнап кафедра т.ғ.к., доцент Ж.М.Сейткулова  «М. Х. Дулатидің өмірі мен шығармашылығы» тақырыбында ашық лекция сағатын өткізді. Ж.М.Сейткулова 1997 жылы 13-15 наурызда, Жамбыл университетінде «М. Х. Дулатидің өмірі мен шығармашылығына» арнап өткен халықаралық ғылыми-тәжірибелік конференция қарарының негізінде Қазақстан Республикасы Үкіметінің 1997 жылғы 3 қарашадағы № 1485 қаулысымен Жамбыл университетіне көрнекті ғалым, тарихшы Мұхаммед Хайдар Дулати есімі берілгендігі туралы атап өтті. Сондай-ақ М. Х. Дулатидің ата тегі, медиевистика саласында әлемге танымал, парсы тілінде жазылған «Тарих-и-Рашиди» еңбегі, көне түркі тілінде жазылған «Жаһан-наме» поэмасының мазмұны және оларды елімізге танымал еткен ғалымдар туралы жан-жақты түсіндірді.Университетіміздегі дәстүрлі «Дулати оқулары»,  «Дулатитану» ғылыми-зерттеу орталығы туралы баяндады.

Студенттерге М.Х.Дулатидің «Тарих-и Рашиди» еңбегінің алғашқы, тарихи жазба түп дерек ретінде маңыздылығы, ұлттық мемлекеттілігіміздің негізі қаланғаны туралы жазылғандығы айтылды. Осы негізбен 2014 жылдың 31 желтоқсанда Қазақстан Республикасы Үкіметінің № 1448 «Қазақ хандығының 550 жылдық мерейтойын 2015 жылы тойлау туралы» қаулысы шығып, әлем жұртшылығы алдында  Қазақ хандығының 550 жылдық мерекесі тойланғаны түсіндірілді. Студенттер ашық лекция сабағынан көрнекті мемлекет қайраткері, тарихшы ғалым, ақын Мұхаммед Хайдар Дулати жайлы көптеген мағлұматтар алды.